| تبليغات | X |
شعر و حکایت بلوچی
سماج دشمن
هزار لوگ سوچ ئی تو یک لوگئ بندئی
مان ای لوگ ء توک ء تو وشّی نه گندئی
جتگ سهر ء هشت را دوتئی دست ء
گون براتانی هونان تو ماری یی بستگ
کی ء پاگ بستگ که تو پاگ بندئی
مان ای لوگ ء توک ء تو وشّی نه گندئی
ترا لالچ انت دولت ءُ مال ءُ زرّ ء
بلی ای لوگ لُمبیت تو چیر ترّئی
ادان تاپ ءُ گیواری تو هم نه رندئی
مان ای لوگ ء توک ء تو وشّی نه گندئی
کجامات ء لال انت که جامگ ئی چاک انت
ءُ کپتگ مه حاکان دپی پُر جاک انت
چی ء مات ءُ رودانی ارداه ء سندئی
مان ای لوگ ء توک ء تو وشّی نه گندی
سر ء دژمن ئی تو وتی قوم ءُ راج ء .....
تو ناسوری ئی ملک ءُ دراهین سماج ء
جهان گون غمان انت ءُ تو گل ء کندئی
مان ای لوگ ء توک ء تو وشّی نه گندئی
ای ورنا کسانین مان گرمین جسان انت
تُشی هیروین ء چتور پلپتان انت
تئی میرین برات انت تو کورئی نه گندئی
مان ای لوگ ء توک ء تو وشّی نه گندئی
مال
ای دور ء مـاتـان مـال ء گـنوکـان
ای دُر ءُ بار یگ چور یگ لوتان
نی ذات چار انت نی جُریات چاران
مـالداری گندان مان چّمان ئئ داران
ای شـرّیـن جـنکّـانی وشّی نه لوتان
ای مال ءُ دولت ای چاندی نه لوتان
عــزیــز ءُ بــراتــان پـجّــاه نــیــاران
وت ء دور داران چه برات ءُ گهاران
دوسـتی ءُ سـیادی بـراتـان نـه چـاران
دوستی گون مال انت مالدار ء چاران
کـسـانـیـن جـنکّانی بر باد انت جوانی
نه چار انت پیری نه چار انت کسانی
دوست ءُ همبلان پادا ات
پروشت سنکلان پادا ات
پادا گوش کتگ نون بام ء
سُهری شنگ کُتگ گور بام ء
بـل ات گـــنـدلان پـادا ات
دوست ءُ همبلان پا دا ات
پادا که سباه ءُ روچ انت
مُرگانی توار ءُ موچ انت
بــــولانــی یــلان پــادا ات
دوست ءُ همبلان پادا ات
دُنـیـا دنـزانـت ءُ تـا مـور انــت
تو پان انت مُج انت ءُ هور انت
زنــدیـن تـرونگل انت پادا ات
میر احمد دهانی
